Poslovne vijesti - Makedonija

Зголемено користењето средства од ИПАРД

Од 400.000 евра на 1,5 милиони за земјоделците и од 800.000 евра на 2,3 милиони за земјоделските стопанства, е зголемен прагот на апсорбирање средства од ИПАРД-програмата.

Како што изјави денеска заменик-министерот за земјоделство, Зоран Коњановски, ваквото решение, по претходно барање на Македонија, е разгледано и прифатено од Европската комисија, а ќе важи од идната година.

- Можноста за поголемо и поефикасно искористување на ЕУ-средствата е отворена во месната и винската индустрија, градинарството, како и во делот на обезбедувањето трактори и останата земјоделска механизација - истакна Коњановски.

Од февруари 2008 година досега се објавени вкупно седум ИПАРД-огласи. На нив се јавиле 536 апликанти, а се одобрени 167 проекти што е третина од поднесените барања, во вкупна вредност од 15,4 милиони евра од кои 7,6 милиони кофинансирала ЕУ.

- Ова покажува дека европските пари се веќе присутни во Македонија и нив може да ги користат земјоделците и стопанството кое се занимаваат со доработка или преработка на земјоделските производи, но сметаме дека, сепак, можеме подобро и повеќе. Затоа континуирано ги следиме апликациите, ги детектираме причините за одбивањето на дел од нив и предлагаме измени на ИПАРД Програмата со цел што поголемо повлекување средства од ЕУ фондовите - подвлече Коњановски.